09923 移卡

移卡業務絕大部份都係收單(尤其微信，支付寶)，面對競爭超多( e. g. 收錢吧，01806匯付天下)，甚至近年來微信支付，支付寶都開始搞收單(主向大型連鎖店埋手，餐飲好多都傾向用美團支付作收單。單從因騰信有少量股份而去入飛係有啲牽強，騰訊投資美團金額更多，而且美團支付好多時對微信支付零抽佣。大陸除淘寶，阿里巴巴外，支付寶用於實體商戶作支付比例肯定遠低於微信。

呢啲收單公司好依賴佣金收入，而主要支出為各大壟斷式清算(微信支付/支付寶/銀行)
同業匯付天下規模相約，早於2年前以超過50倍市盈招股(而且又係里昂)，結果從來股價長期潛水，到今日仲得返不足9倍。移卡若上限定價，對應市盈為20.88倍，如果2020業績維持高速增長，呢個估值係合理。但以01806匯付天下作對照，移卡憑乜會跑贏咁多？

中大型 ipo比較講究基本面，我認為移卡估值明顯偏高，值博率太低。

網上有啲券商(尤其紅底)不停吹捧移卡，其中一點幾搞笑，竟然指里昂係明星保薦！翻查過往紀錄，里昂旗下表現比較好通常拍住大摩，今次拍住同樣渣流攤嘅野村同農銀，就算升我估計都係幾個%，為左呢啲股去借孖展甚至抽B，分分鐘賺埋唔夠冚息，盞搞

02381 蜆壳電業

今次屬二進宮上市，上次下限價0.335元(今次定格0.25元)，搞笑係上次招股寫明公開：國配比例為五五開，剩係呢點都令所有人卻步(甚至包括國配)，今劑捲土重來用返正常1：9, 承銷更轉由千里碩牽頭。

公司業務單一，好典型嘅 OEM代工股，勝在訂單相對穩定(呢d基本面都唔糸重點)。

今次其中45％為舊股，見到都冇乜心機刨落去。

翻查近2年半數據
[總手40000-62500，回撥30-40％]出現33次
暗盤9升2平22跌，首日7升2平24跌。

[總手50000, 回撥30-40％]出現10次
暗盤1升9跌，首日2升8跌

可謂血流成河，我自己就食花生睇下會唔會又人踩人。

01645 海納智能

宜家新股市場非常熾熱，連二進宮嘅02381蜆殼電業都大把孖展吼，更莫講01645海納智能了。
各大V(雪球，牛牛)都爭相把(口罩機械)作為此股重心，搞到第一日孖展都超32倍，估計埋單好可能過100倍，正常情況下回撥至50％。基本面唔想多講，網上大把內容，我再係度9噏盞哂大家時間。

重點係每手股數為4000股/手，明明可以2000/2500股，但偏偏要搞到咁高，令總手數只有29000手。當然，若無乜散戶認購而唔使回撥就好有值博價值，但宜家擺明好有機會回撥至五成，又糸另一故事。

回顧近2年半主板(總手12500-35000)出現21次，其中出現10次需要回撥至50％
暗盤（7升1平2跌)，首日(4升6跌)。
有趣係果21次中有5次“幸運地”減少回撥，結果暗盤4升1平，首日4升1跌。

招股價1.08-1.5實在太闊，萬一上限定價而回撥至50％就好有機會攬炒。
3/6上市，係佢之前就係移卡同蜆殼電業，若果呢2隻表現麻麻，對守尾門嘅海納智能壓力可想而知。

其實老散行為好鍾意跟紅頂白，3月尾01463 C-link大漲，01942 MOG Holdings 即刻超多孖展熱死咗(同輪上演類似劇情仲有08620亞洲速運)

到下一輪01376 Raffles Interior ，散戶又開始縮沙，結果爆冷大升。

見到01953 Rimbaco Group大升，散戶又去力追01147 伊登軟件 意圖覆桌，結果又玩人踩人式大跌。

到最近上輪01936 Ritamix / 08496 新加坡美食控股爆到七彩，散戶又再一次意圖覆桌又去狂追今輪(02381/09923/01645)！？

我自己認為01645海納智能只有人為地減少回撥至20％及下限定價先有機會跑出，但呢種想法太被動，更似望天打卦式自我幻想。