06969 思摩爾國際

公司為全球市佔第一嘅電子煙ODM企業，客戶絶對頂級(英美煙草，日本煙草，reynolds等)唔食煙嘅我都肯定聽過。

可比公司於港股系無，但可利用300014億緯鋰能及002595盈趣科技去比較。

002595 盈趣科技現時trade 緊26倍PE, 公司其中一個業務為電子煙器具生產，于對上業績，"創新消費電子產品"占全年所有增長嘅70%，而公司市值約257億人民幣。

300014億緯其實係2014年成為麥克韋爾大股東(思摩爾前身)，後來2017年公司創始人買回億緯當時持股8.98%先再次成為實際大股東為宜家上市開路。

翻查300014億緯最新年報，發現該38.38%持股於2019已帶來共8.22億人民幣利潤(同期公司總利潤先得15.48億人民幣)，可見該部份持股占全公司利潤過半，現時公司總市值875億人民幣，對應PE 55.6倍。

06969思摩爾若上限定價，市值712億港元，對應歷史PE為29.81倍。

億緯自己電池業務營收64億人民幣，扣除思摩爾利潤8.22億人民幣後，只剩低8億人民幣為主營業務之溢利。(主營業務純利率約12.5%)

思摩爾yr19營收76.1億人民幣，純利21.73億人民幣(純利率28.6%)

可見億緯高估值高PE跟思摩爾有好大關係。

公司最大風險係各國對電子煙政策及中美貿易協定。

今次發行574352手算偏多，對上海吉亞共60萬手，共凍1348.7億港元(海吉亞首日孖展286億 vs 思摩爾196億)估計最終超倍未必去到450倍，即有效為90倍左右，B頭有望以1%起跳。

我預算首日升30%以上，值博率比1477高(分貨更多)，而且有中煙效應(當時一個月唔到升5倍)，抽中即食或者留返部份放風箏都未嘗不可。

聲明: 以上內容純屬個人意見及分享，並不構成投資、買賣建議或推薦。

09989 海普瑞-H

公司為肝素領先藥企，但公司在該藥雖然占全中國第一及全球第三，但呢種藥根本唔系咩貴價野(大陸投標價約40元左右)，可想公司以規模效益去攻佔歐美中市場(有別於一般已上市-B藥股)

而且該藥已經過哂專利，即任何藥企都可以仿製，可預料不斷靠壓低成本去爭市場有幾慘烈。

更奇怪系公司預測2020/2021/2022肝納素及API產品因原材料價格上升(非洲豬瘟導致腸衣供應短缺)而會受益。我自己對醫藥唔識，但憑常識認為原材料成本上升，若需求彈性很低(冇替代藥物)，照計終端產品或API原料品理應水漲船高，但升幅估計也是相約，但管理層認為終端產品及API產品售價會倍升，我對此表示質疑，甚至認為管理層有誇大畫餅之嫌。

腸衣成本預計升30%，但産品及API價格會升80%-100%?

另外，yr19業績看似大躍升(對比yr18 ↑69%)，但其實於2019年3月將子公司hightide 分拆，以獲得一次性收益約5.739億人仔，若扣除該收益，yr19稅前收益甚至比yr18差，呢d做法無不令人懷疑為二次上市而整靚盤數。

翻查大摩及高盛對於先A後H表現，撇除01776廣發證券及06806申萬宏源外，其餘首日升跌幅非常有限。

今次難得亮點係orbimed入重飛(50M美元)，之前幾次入股其他藥企都少於50M美元[但會否之前果堆太hit, 根本分唔到咁多？而今次09989又冇乜其他基石爭？]

我預期升幅非常有限，甚至只有0%-5%左右。

聲明: 以上內容純屬個人意見及分享，並不構成投資、買賣建議或推薦。

01502 金融街物業 + 01957 MPV Intl ltd

01502 金融街物業

公司主營商業類物管，對比同行為9909寶龍商業及9928時代鄰里

09909 宜家trade 緊55倍PE, 09928 達88倍PE...而且2隻對比招股(約半年前)已升超100%。金融街招股對應歷史PE 為20.77-21.96倍，已存在一定折讓，就算增速冇前二者快，呢個估值已足夠安全。

Pre IPO冇禁售，但翻查幕後為財政部摣弗，斷估唔會無啦啦一上市就套現。

估計一手中簽率可能有50%，10中1左右。

01957 MPV Intl ltd

  

大馬成衣批發股，基本面受MCO影響一定有，但從來玩大馬/新加坡IPO唔care 呢d野(例如08496 新加坡美食控股)

翻查對上一年資料，大馬/新加坡中小型ipo有18隻，有趣數據如下:

首日5↓2平11↑

輝立暗盤5↓1平12↑

如果再sort成散戶只占10%貨或好心式由30%回撥至20%共11次

首日11次全升

輝立暗盤1↓10↑

而且大馬/新加坡股每次出事(首日/輝立暗盤)，清一色因觸及回撥(30%)或屈機式回撥(由10%→20%)

宜家01957孖超2.04倍，估計唔超14機會相當高，再加上受力天大跌影響+二進宮+市場大資金已被康基及海吉亞吸乾+剩餘資金留力星期三及五招股果堆，今次01957 MPV Intl ltd絕對有爆冷機會。

估計一手中簽可能低至10%，15左右中1先安全。

聲明: 以上內容純屬個人意見及分享，並不構成投資、買賣建議或推薦。

01650 Hygieia group

新加坡公司，主業商業客戶清潔服務，類似01955 莊臣，01397碧瑤....中小型新股基本面對玩ipo唔太重要(反而如果業績太靚、有幻想空間更易聚飛而出事e.g. 01645 海納智能)

牌面缺點：

－新加坡疫情有排搞，中小企cut cost, 對01650有直接損失(好在新加坡政府基本補貼公司大部份開支如人工)

－二進宮，對上一隻02381 蜆殼電業首日大插43%

上一次一月頭公司埋門一腳取消上市(孖展終超16.25倍)，而該次包銷傭金率為10%..今次升至15%。

01650 Hygieia group現孖展超3.84倍，處於比較尷尬局面，翻查對上2年半數據，總手60000-65000出現35次，而孖展超3.84倍情況下係比較傾向終超14倍，但我今次仍選擇一博，原因如下:

- 招股期撞正康基及海吉亞兩大熱門，有故意揾掩護而犯案嘅可能性。

- 孖展計息由一般6-7日大幅延長至13日，雖然中間有一日端午，亦無必要拖到咁長，有可能想增加大額孖展客成本以達到趕散戶客效果。

- 上次截孖超16.25倍，今次已大幅縮至3.84倍，值博率比上次好。

- 多間券行對康基及海吉亞嘅孖展額度於截孖前幾粒鐘都相繼爆額，估計有一定散戶改由現金飛進攻康基及海吉亞，因此可能相對較少現金埋手01650 Hygieia group。

聲明: 以上內容純屬個人意見及分享，並不構成投資、買賣建議或推薦。

09958 力天影業

公司主業大陸電視劇製作及發行，同業可參照年初上市嘅01740新石文化。

基本面力天稍比新石好少少，但新石自上市後首份業績走哂樣，毛利率由51.9％大跌至28.5％,公司解釋話其中一啲自製劇太高成本，又話 cctv限制佢地播出集數，乜都佢講哂。但我認為當初新石招股火爆有多方因素:

- yr18業績比 yr17 大幅增長，實情呢行好多開支可以劃前一年入賬，之前未來收入又可人為地集中劃到某一年度入賬等等。

- 19年12月有大型熱門 ipo(02500啟明醫療, 09966 康寧傑瑞, 06049保利物業）, 新股市場氣氛熾熱，直接導致09911赤子城狂超1440倍(首日更爆炒升幅達93％）,散戶當01740新石文化系09911赤子城翻版，結果首日仲有得升40％（但暗盤追入就大單，暗盤收報升80％)，間接傳導去到09916興業物聯同01941燁星集團兩隻小型物管股，結果是乙組賺價蝕息損手離場。

新石自上市首日就系history high(嚴格計由09：31算)，一直隊到宜家得返0.221元(招股價為0.5元)，對應PE為8.5倍

以上基本面了解下就算，對玩IPO唔係好重要。

重點如下:

散戶經歷上輪02381蜆殼電業/09923移卡/01645海納智能大幅坑殺後，追中小型 ipo氣溫驟降，網上好多大V也不推薦力天。

加上同業新石由上市招股價至今股價已跌超55％,好多老散已成驚弓之鳥。

翻查對上2年半紀錄，總手62500-80000而截孖超4倍以下(力天截孖超2.58倍)出現22次，扣除02682潤利海事/01903JBB Builders白痴分貨方式後計有20次。

首日收市：12升2平6跌

總手50000-80000，以及散戶佔貨10％(無回撥)出現32次
首日收市 ：23升2平7跌
輝立暗盤收市：29升1平2跌

宜家力天孖展超2.58倍，好有機會唔超14倍, 我自己認為有以下原因:

- 京東已分流部份散戶資金
- 下星期2大醫藥熱門 ipo同時招股
- 上星期四美股大插(直接導致輝立孖展縮飛)，星期五反彈力度不大，散戶又開始心虛。

風險：
-若保賤最終以國配不足為由，強行由10％貨加回撥至公開市場至20％就神仙難救。
-招股價太闊2.56-3.84
-pre ipo 冇禁售

我自己會全戶出擊, 中簽率估計25％左右，更可能要15手或以上先穩中一手。

聲明: 以上內容純屬個人意見及分享，並不構成投資、買賣建議或推薦。

09999 網易

網易基本面就係一隻大型遊戲股，當中遊戲業務佔比一半以上，其餘業務為左線教育及音樂等，呢d完全唔係重點，因網易本身美股已上市，兩邊股價會高度趨向一致。
截至4/6, 網易 ADR報414.58美元，折合港股應值128.52港元。
今次預計香港股價發行最高為126港元，如果學阿里有3％定價折讓為122元。

孖展截至下午12時左右為 525億，估計埋單加上現金及銀行孖展應有1500億左右，對應有效實際超倍57.6倍，我預計B頭會分貨達1.5％（400中6)
若122港元定價，計上孖展(息2％)及其他費用，總開支為2064元,折合每股成本3.44港元[125.44元]

若126港元定價，計上孖展(息2％)及其他費用，總開支為2088元,折合每股成本3.48港元[129.48元]

我認為122元定價機會比126元高，預計B頭最後純利可能只有1800元左右(但總支出2064元)所以，上唔上B頭見仁見智。

聲明: 以上內容純屬個人意見及分享，並不構成投資、買賣建議或推薦。