新股

2021年3月22日星期一

02195 盈匯企業控股

公司為典型本地建築股，中小型（總手50000）

招股PE為11.56-12.95倍，以本地建築股屬偏貴，勝在冇pre ipo已經煩少樣野。

對付中小型ipo尤其建築股一般唔使理基本面，基本面越好（低PE... 超乎尋常增速... 低PB...高ROE..)只會引飛反而累事。

自諾輝事件後，ipo遭遇冷鋒，好多暗盤/首日跌到暈（昭衍、賽生、朝雲、廣聯、久久王）唯一冇事屬二手飯（汽車之家及百度，估計B站都係升跌有限）。氣氛差到令好多散戶唔敢狂孖，截至第2日02195孖展只超1.49倍，同建築股廣聯（又咁橋係均富保薦），次日截孖超18倍，終超53倍引發40%回撥，AB組夾埋47199人，結果輝暗仲升到3.7%首日大插22.22%

要爆冷首要條件就係冇人吼，而且總手越少越好，以回撥10%最理想。舊年嘅建築中小ipo爆冷代表為01376/06063/02115/00368/01408/01472....

翻查對上3年紀錄，正常發行架構下嘅建築股ipo共59次，終超0-14倍共28次（其中6次向上套路回撥）

輝暗10↓1平17↑

首日9↓1平18↑

總手50000-62500 以及終超0-14倍共41次

輝暗8↓33↑（平均升幅24%）

首日11↓1平29↑（平均升幅31.35%）

再縮窄分析範圍至總手50000 以及終超0-14倍共有22次

輝暗4↓18↑（平均升幅20.41%）

首日7↓1平14↑（平均升幅18.25%）

向上增加套路回撥出現4次，其中一次為均富保薦

均富近3年保薦9次，清一色中小型建築股

0-14倍為5次，但竟然有3次向上回撥，造成輝暗全大跌，首日2↓1↑（兼跌幅收窄）果3次均為阿斯特朗做承銷。特別之處係均富對上果9次（今次都係）只扮演保薦人角色，包銷事宜悉數由其他行負責。向上回撥會唔會因為承銷問題而唔關均富事呢？

今次老散一黎因ipo多隻穿招兼見到均富馬上嚇窒，但爆冷往往就係響冇人留意之下跑出，係02195之前上市有02187及06939...萬一呢2隻其中一隻爆冷，對之後緊接上市嘅02195絕對有正面幫助。

聲明: 所有個人交易紀錄純屬分享及作為一個紀錄，並不構成投資、買賣建議或推薦。

2021年1月17日星期日

06668 星盛商業

星盛商業06668純做商業物業（商場為主，尤以大灣區特別集中於深圳），對比港股中卓越商企06989、寶龍商業09909、華潤萬象01209。

卓越06989本身物管組合主打辦公室及商業綜合體，而且主打大灣區

寶龍09909本身主打商場，但亦有少量住宅，地理位置集中長三角（二線城市為主）

華潤萬象01209為全國性老牌國企不停輸送物業，而商管亦在深圳非常出色，有必要放埋一齊比較（縱然住宅及商業佔比各半）

從下表各種指標分析，可發現星盛06668毛利率遠超其他物管，原因為其只做商業類物業（尤其商場），把卓越06989嘅辦公室為主拋離九條街，亦無須受地方政府指導價制約（住宅類管理費不能隨便亂加），所以商場物管毛利率往往好高（在寶龍09909，華潤萬象01209都有類似情況）

根據2019年深圳購物中心銷售排名，能跟萬象、海岸城、壹方系（鴻榮源）並列可見星盛06668係競爭最激嘅一線城市實力不能少看。

估值方面，寶龍09909宜家trade緊四十幾倍PE，卓越06989用最新半年業績去預期2020全年業績對應宜家PE為28.36倍。星盛06668根據招股書披露2020全年預算溢利對應招股PE為22.33-27.07倍。由此可見星盛06668定價十分分理，我認為已存在一定折讓（因為毛利率及物業組合，品牌因素等遠超卓越06989）去唔去到寶龍商業09909嘅級數就好難講，始終星盛06668嘅母公司（星河）唔似寶龍商業09909母公司咁強勁。

整體出租率更拍得住一線部隊華潤萬象01209，更長期拋離寶龍商業09909，對做商場商管類至為重要，因低出租率=收唔到每月嘅商管費，以及代表個場人氣唔夠，長期係咁更會造成惡性循環。

星盛06668係每年在管面績及合約面積增速係最低，呢個係一大風險，好在公司已成功用輸出品牌模式吸引第三方開發商為其客戶，呢種模式毛利率更高（因星盛06668只派高管去協助打理，人力成本最低），而亦因cocopark之成功所以先吸引到各地爭相搵星盛06668輸出品牌，預期呢種模式會快速複制至其他地方，彌補母公司輸血太慢嘅尷尬。

基石佔比超3成，其中不乏有深圳國資委及新世界身影，唔似冇料到。

物管類輝立暗盤收市同正日收市分別唔會太遠，富途暗盤收市永唔會同輝立偏離太多。適逢對上3隻物管首日見紅（預期宋都09608首日都係見紅居多），希望對星盛06668孖展降下溫（事實上宋都09608暗盤當天牛牛出現輕微抽飛），加上三大銀行冇開孖，呢次星盛06668頂盡超800倍左右，對應B頭中簽率為0.5%左右，A組估計100中1，一手中簽10%。

聲明: 所有個人交易紀錄純屬分享及作為一個紀錄，並不構成投資、買賣建議或推薦。

2020年12月10日星期四

02148 Vesync

公司主打小家電線上銷售（主戰場為美國amazon), 帶自身品牌（levoit, etekcity, cosori) 其中了對比同業為01691 JS環球生活及002959 小熊電器。

武漢肺炎下，呢類小家電股受益（因疫情冇得出街，多吃時間係屋企，多咗時間去烹飪，多咗時間去上網買野等）。01691 JS環球生活今年累升2倍，而002959 小熊電器升幅都有1倍，公司搵疫情快達1年時去上市，盤數自靚好多。

若用2020Q2 業績去推算，預測2020全年PE對應上限招股價為18.46倍（01691 家下trade緊41.18倍而002959都有40.9倍）可見02148 Vesync估值有一定折讓。

如果單靠疫情宅經濟去谷大生意就肯定唔會持久，但其實公司推出貴價產品如空氣凈化機，氣炸鍋亦大受歡迎，而且在amazon分類表現亦分列第一及第二，加上自2019下半年主打vendor central （比seller central高級太多太多），銷售及毛利馬上坐火箭上升。

高瓴做大基石，夾埋其他已達初步發行股份的50%，似層相識嘅感覺，前段大熱嘅未盈利醫藥股就多數係咁，國配最多分到從增配發行果15%貨為主（因基石有禁售期）

風險

-太靠amazon，若得罪amazon（之前都試過被罰停賽一個月），後果不堪設想

-美國貿易關稅，尤其佔公司70%生意嘅空氣凈化機及氣炸鍋，豁免期到期為31/12/2020。會唔會extend 豁免無法預計。

-法巴過往保薦大多慢熱（其實01691 JS環球生活都係上咗幾個月先開車）

聲明: 所有個人交易紀錄純屬分享及作為一個紀錄，並不構成投資、買賣建議或推薦。

2020年12月9日星期三

02131 云想科技

公司為大陸短視頻營銷方案供應商，即係做短視頻平台（抖音等）及廣告主嘅中間人，係短視頻以插入文字方式顯示廣告，當用戶點擊後便直連第三方網站。同比公司為06988樂享互動。

云想科技招股PE對應招股價為51.84-66倍（預期2020年全年業績對應33.12-42.18倍），引用樂享中期業績，樂享互動宜家trade緊約42.95倍PE。所以云想科技若唔係上限定價仍然有一定水位。但我估計云想科技日後表現應該差於樂享互動。

云想科技

樂享互動

云想科技主要針對短視頻，而樂享主打微信小程序，但云想科技嘅純利率(7.16%)遠低於樂享互動(17.6%)，相信因為短視頻營銷供應商競爭非常激烈，令公司要用劈價（增加返點俾廣告主等手段），長遠睇短視頻嘅跑道肯定會大於微信小程序。

云想科技今次基石唔豪華，最出名只有小米及商湯，但金額非常少，不能作準。

上次樂享互動招股時大陣仗，截孖凍929.99億，終凍2849億，超1631倍，而且果時公司主席打開口牌，非法國配滿場飛，結果輝暗高開25%後同日穿招（牛牛高開42%，最高升過77%，收市只微升2.78%）。今次云想科技招股冷落好多，或者係對IPO係一件好事。

聲明: 所有個人交易紀錄純屬分享及作為一個紀錄，並不構成投資、買賣建議或推薦。

2020年12月3日星期四

09992 泡泡瑪特

公司為潮玩零售企業，主打自己獨家IP，毛利達70%，而且幾乎95%以上自營（實體店+自助販售機+網上直銷），少量同金鷹商貿合作（但之後因地盤問題反面兼對簿公堂）

以2019年業績計，招股PE為82-100倍，非常離地。但根據招股書，毛利截至九月份三個月對比2019 Q3增加50%，保守預測2020年全年溢利增加50%以上。即預測PE為54.68-66.84倍。(其實如果增速75%絕對有可能，因今年新IP主要係下半年推出，雙11時段亦係全年銷售高峯，公司更坐穩2019 （估計2020一樣）天貓玩具類雙11品牌GMV冠軍。)

最大特點係網店直接交易額已經超越門店，而且毛利率亦係最高，證明有一堆忠實fans已由門店轉至網店（天貓+微信小程序+自營網店），重覆性購買行為持續。但其實仲有一個特點係招股書或坊間股評冇提及--"隱藏款”。隱藏款係每個盲俠系列中一個特殊款，抽中機會率好低，所以衍生1.發燒友為為集齊一套兼特殊款，要用大量成本去重複購買盲盒 2. 有炒家去轉讓特殊款圖利。無論1/2都助長整體銷量。

主要隱憂

-pre ipo非常多，而且折讓近55%~79%不等，更有部份冇禁售。

-冇基石

主要優勢

-概念獨特，競爭對手一時三刻好難抄（因客戶係買IP而唔係求其當玩具買）

-排在京東健康後，估計京東健康有25%甚至更高升幅，對緊接3天后上市嘅泡泡瑪特會有一定幫助

-大摩保薦，極少甩拖

-國配聽聞超好多倍而且事實上都提出截飛

我預計升幅會有20%以上，因為市場對泡泡瑪特看法分歧兼大資金已被京東健康吸走，預計終凍係2500-3000億左右，對應超購400-480倍，B頭預0.8%~1%中簽率。

聲明: 所有個人交易紀錄純屬分享及作為一個紀錄，並不構成投資、買賣建議或推薦。

2020年10月24日星期六

02126 藥明巨諾

公司為生物藥未盈利，仲每日不停燒錢中，可對比港股為06978 永泰生物，美股中概LEGN傳奇生物，美股CAR-T生物藥公司Allogene (ALLO)，Cellectis (CLLS)

藥明巨諾其實為JUNO與藥明合資經營，之所以叫JUNO純因匪語發音，而之後於2019年百美施貴寶（BMY)用740億美元全購JUNO收歸旗下。

藥明在研藥物管線上，主打CAR-T 生物藥，以CD19 作靶點，全球現成FDA已批CAR-T藥物只有2隻

1. YESCARTA（由KITE研發，後來被GILEAD以約922億港元全購）

2. ZOLGENSMA 由藥企巨頭諾華研發

呢2間大野當然好出名，但旗下CAR-T生物藥整個療程比標靶藥快好多，但價錢亦超高，起碼37-47萬美元，因為每人嘅CAR-T方案都係tailormade，所以亦可側面解釋點解GILEAD及BMY肯出天價去收購相關公司。

永泰生物主打細胞免疫療法，但其改造細胞無改變其基因，而CAR-T係需要改變其基因，兩者實際比較（效用、安全性、與其他療法性價比較）我無法提供任何意見，始終我唔係醫生。

但永泰生物做CAR-T CD19相關管線比較慢，宜家最多都仲係IND階段，而藥明巨諾嘅CAR-T CD19 已到新藥優先審查申請階段，估計申請快速通過並商業化，簡單講只係差埋門一腳，比永泰生物同類快幾條街。

藥明巨諾

永泰生物

永泰生物今年7月上市，當時招股市值介乎52.5億~55億港元，首日升38%（對應市值77.4億港元），截至23/10股價得返9.99 （招股價為11元），對應市值51.41億。

藥明巨諾今次招股介乎市值75.2億~89.52億港元，直接對比永泰招股時貴好多，但永泰所處藥物管線跟藥明巨諾有分別，至少在CAR-T療法上慢太多太多。

另一只可比同業為傳奇生物LEGN，今年6月美股上巿，首日爆升60%，累升20.08%（現在市值約276億港元），當時傳奇生物係自母公司01548 金斯瑞生物科技分拆出黎，而01548 股價於LEGN上市前夕亦創今年新高（19.2 元），現價11.56元。

未盈利醫藥公司係2018年至今共22次，首日5↓2平15↑，細心睇返果幾隻（02181 / 02696 / 01875 /03681）做果D藥都係執二攤（生物類似藥）或非癌症新藥如風濕，哮喘為主。

而且，基石陣容及規模亦較弱

（02181 邁博藥業基石為三生制藥，認購佔比16.69%）

（02969 復宏康霖4個基石，總認購佔比先34.19%）

（01875 東曜藥業有比較好少少嘅vivo fund，但3基石總佔比先得26.95%）

（03681 中國抗體: 雲南白藥、瑞捷軟件做基石！？做軟件搞乜鬼藥！？一個鬼佬基石都冇，總佔比34%）

藥明巨諾今次上市基石唔可以講超豪華（對比雲頂有GIC、orbimed、Blackrock等），但有rock spring capital、Hillhouse都算唔太差，起碼若上限定價，總佔比都達50%（國配要靠行使超額配售權先分到有限貨）

最後輪融資（3/5/2020)折讓27.6%，未算太過份，而公司股東鼎盛，有淡馬錫、紅杉資本、美國巨諾（由BMY出資），斷估公司都唔會衰得去邊。

今次藥明巨諾總手195384（雲頂新耀127094總手）

藥明巨諾首日超102倍（雲頂新耀超70倍）

藥明巨諾首日孖展241億（雲頂新耀249億）

雲頂新耀當時受嘉和生物影響，市場資金短缺，但最終都有匯豐開低息孖，埋單共凍2287億元。今次藥明巨諾受螞蟻影響，市場資金更短缺，匯豐中銀恆生同時缺席，最終埋單未必有2000億元，加上近排穿招不斷（先聲有高瓴加持，大摩揸旗，凍資2104億元暗盤都跌到一塌糊塗[當然，先聲有自身估值過高問題，在此不詳述])

我預測最多好可能只凍1200億左右，即對應超500倍，B頭（30萬股）極可能1%起跳，即中3000股。

聲明: 所有個人交易紀錄純屬分享及作為一個紀錄，並不構成投資、買賣建議或推薦。