02148 Vesync

公司主打小家電線上銷售（主戰場為美國amazon), 帶自身品牌（levoit, etekcity, cosori) 其中了對比同業為01691 JS環球生活及002959 小熊電器。

武漢肺炎下，呢類小家電股受益（因疫情冇得出街，多吃時間係屋企，多咗時間去烹飪，多咗時間去上網買野等）。01691 JS環球生活今年累升2倍，而002959 小熊電器升幅都有1倍，公司搵疫情快達1年時去上市，盤數自靚好多。

若用2020Q2 業績去推算，預測2020全年PE對應上限招股價為18.46倍（01691 家下trade緊41.18倍而002959都有40.9倍）可見02148 Vesync估值有一定折讓。

如果單靠疫情宅經濟去谷大生意就肯定唔會持久，但其實公司推出貴價產品如空氣凈化機，氣炸鍋亦大受歡迎，而且在amazon分類表現亦分列第一及第二，加上自2019下半年主打vendor central （比seller central高級太多太多），銷售及毛利馬上坐火箭上升。

高瓴做大基石，夾埋其他已達初步發行股份的50%，似層相識嘅感覺，前段大熱嘅未盈利醫藥股就多數係咁，國配最多分到從增配發行果15%貨為主（因基石有禁售期）

風險

-太靠amazon，若得罪amazon（之前都試過被罰停賽一個月），後果不堪設想

-美國貿易關稅，尤其佔公司70%生意嘅空氣凈化機及氣炸鍋，豁免期到期為31/12/2020。會唔會extend 豁免無法預計。

-法巴過往保薦大多慢熱（其實01691 JS環球生活都係上咗幾個月先開車）

聲明: 所有個人交易紀錄純屬分享及作為一個紀錄，並不構成投資、買賣建議或推薦。

02131 云想科技

公司為大陸短視頻營銷方案供應商，即係做短視頻平台（抖音等）及廣告主嘅中間人，係短視頻以插入文字方式顯示廣告，當用戶點擊後便直連第三方網站。同比公司為06988樂享互動。

云想科技招股PE對應招股價為51.84-66倍（預期2020年全年業績對應33.12-42.18倍），引用樂享中期業績，樂享互動宜家trade緊約42.95倍PE。所以云想科技若唔係上限定價仍然有一定水位。但我估計云想科技日後表現應該差於樂享互動。

云想科技

樂享互動

云想科技主要針對短視頻，而樂享主打微信小程序，但云想科技嘅純利率(7.16%)遠低於樂享互動(17.6%)，相信因為短視頻營銷供應商競爭非常激烈，令公司要用劈價（增加返點俾廣告主等手段），長遠睇短視頻嘅跑道肯定會大於微信小程序。

云想科技今次基石唔豪華，最出名只有小米及商湯，但金額非常少，不能作準。

上次樂享互動招股時大陣仗，截孖凍929.99億，終凍2849億，超1631倍，而且果時公司主席打開口牌，非法國配滿場飛，結果輝暗高開25%後同日穿招（牛牛高開42%，最高升過77%，收市只微升2.78%）。今次云想科技招股冷落好多，或者係對IPO係一件好事。

聲明: 所有個人交易紀錄純屬分享及作為一個紀錄，並不構成投資、買賣建議或推薦。

09992 泡泡瑪特

公司為潮玩零售企業，主打自己獨家IP，毛利達70%，而且幾乎95%以上自營（實體店+自助販售機+網上直銷），少量同金鷹商貿合作（但之後因地盤問題反面兼對簿公堂）

以2019年業績計，招股PE為82-100倍，非常離地。但根據招股書，毛利截至九月份三個月對比2019 Q3增加50%，保守預測2020年全年溢利增加50%以上。即預測PE為54.68-66.84倍。(其實如果增速75%絕對有可能，因今年新IP主要係下半年推出，雙11時段亦係全年銷售高峯，公司更坐穩2019 （估計2020一樣）天貓玩具類雙11品牌GMV冠軍。)

最大特點係網店直接交易額已經超越門店，而且毛利率亦係最高，證明有一堆忠實fans已由門店轉至網店（天貓+微信小程序+自營網店），重覆性購買行為持續。但其實仲有一個特點係招股書或坊間股評冇提及--"隱藏款”。隱藏款係每個盲俠系列中一個特殊款，抽中機會率好低，所以衍生1.發燒友為為集齊一套兼特殊款，要用大量成本去重複購買盲盒 2. 有炒家去轉讓特殊款圖利。無論1/2都助長整體銷量。

主要隱憂

-pre ipo非常多，而且折讓近55%~79%不等，更有部份冇禁售。

-冇基石

主要優勢

-概念獨特，競爭對手一時三刻好難抄（因客戶係買IP而唔係求其當玩具買）

-排在京東健康後，估計京東健康有25%甚至更高升幅，對緊接3天后上市嘅泡泡瑪特會有一定幫助

-大摩保薦，極少甩拖

-國配聽聞超好多倍而且事實上都提出截飛

我預計升幅會有20%以上，因為市場對泡泡瑪特看法分歧兼大資金已被京東健康吸走，預計終凍係2500-3000億左右，對應超購400-480倍，B頭預0.8%~1%中簽率。

聲明: 所有個人交易紀錄純屬分享及作為一個紀錄，並不構成投資、買賣建議或推薦。

02126 藥明巨諾

公司為生物藥未盈利，仲每日不停燒錢中，可對比港股為06978 永泰生物，美股中概LEGN傳奇生物，美股CAR-T生物藥公司Allogene (ALLO)，Cellectis (CLLS)

藥明巨諾其實為JUNO與藥明合資經營，之所以叫JUNO純因匪語發音，而之後於2019年百美施貴寶（BMY)用740億美元全購JUNO收歸旗下。

藥明在研藥物管線上，主打CAR-T 生物藥，以CD19 作靶點，全球現成FDA已批CAR-T藥物只有2隻

1. YESCARTA（由KITE研發，後來被GILEAD以約922億港元全購）

2. ZOLGENSMA 由藥企巨頭諾華研發

呢2間大野當然好出名，但旗下CAR-T生物藥整個療程比標靶藥快好多，但價錢亦超高，起碼37-47萬美元，因為每人嘅CAR-T方案都係tailormade，所以亦可側面解釋點解GILEAD及BMY肯出天價去收購相關公司。

永泰生物主打細胞免疫療法，但其改造細胞無改變其基因，而CAR-T係需要改變其基因，兩者實際比較（效用、安全性、與其他療法性價比較）我無法提供任何意見，始終我唔係醫生。

但永泰生物做CAR-T CD19相關管線比較慢，宜家最多都仲係IND階段，而藥明巨諾嘅CAR-T CD19 已到新藥優先審查申請階段，估計申請快速通過並商業化，簡單講只係差埋門一腳，比永泰生物同類快幾條街。

藥明巨諾

永泰生物

永泰生物今年7月上市，當時招股市值介乎52.5億~55億港元，首日升38%（對應市值77.4億港元），截至23/10股價得返9.99 （招股價為11元），對應市值51.41億。

藥明巨諾今次招股介乎市值75.2億~89.52億港元，直接對比永泰招股時貴好多，但永泰所處藥物管線跟藥明巨諾有分別，至少在CAR-T療法上慢太多太多。

另一只可比同業為傳奇生物LEGN，今年6月美股上巿，首日爆升60%，累升20.08%（現在市值約276億港元），當時傳奇生物係自母公司01548 金斯瑞生物科技分拆出黎，而01548 股價於LEGN上市前夕亦創今年新高（19.2 元），現價11.56元。

未盈利醫藥公司係2018年至今共22次，首日5↓2平15↑，細心睇返果幾隻（02181 / 02696 / 01875 /03681）做果D藥都係執二攤（生物類似藥）或非癌症新藥如風濕，哮喘為主。

而且，基石陣容及規模亦較弱

（02181 邁博藥業基石為三生制藥，認購佔比16.69%）

（02969 復宏康霖4個基石，總認購佔比先34.19%）

（01875 東曜藥業有比較好少少嘅vivo fund，但3基石總佔比先得26.95%）

（03681 中國抗體: 雲南白藥、瑞捷軟件做基石！？做軟件搞乜鬼藥！？一個鬼佬基石都冇，總佔比34%）

藥明巨諾今次上市基石唔可以講超豪華（對比雲頂有GIC、orbimed、Blackrock等），但有rock spring capital、Hillhouse都算唔太差，起碼若上限定價，總佔比都達50%（國配要靠行使超額配售權先分到有限貨）

最後輪融資（3/5/2020)折讓27.6%，未算太過份，而公司股東鼎盛，有淡馬錫、紅杉資本、美國巨諾（由BMY出資），斷估公司都唔會衰得去邊。

今次藥明巨諾總手195384（雲頂新耀127094總手）

藥明巨諾首日超102倍（雲頂新耀超70倍）

藥明巨諾首日孖展241億（雲頂新耀249億）

雲頂新耀當時受嘉和生物影響，市場資金短缺，但最終都有匯豐開低息孖，埋單共凍2287億元。今次藥明巨諾受螞蟻影響，市場資金更短缺，匯豐中銀恆生同時缺席，最終埋單未必有2000億元，加上近排穿招不斷（先聲有高瓴加持，大摩揸旗，凍資2104億元暗盤都跌到一塌糊塗[當然，先聲有自身估值過高問題，在此不詳述])

我預測最多好可能只凍1200億左右，即對應超500倍，B頭（30萬股）極可能1%起跳，即中3000股。

聲明: 所有個人交易紀錄純屬分享及作為一個紀錄，並不構成投資、買賣建議或推薦。

06989 卓越商企服务

 公司主營商業類物業管理，可同比09909 寶龍商業及01502 金融街物業。

以2020年半年結年報對比，PEttm如下:

01502 金融街物業19.855倍

09909 寶龍商業53.157倍

06989 卓越商企服务30.95倍

01502 金融街物業

09909 寶龍商業

06989 卓越商企服务30.95倍

但細心睇翻，01502 金融街物業住宅佔比比其他2隻為重，而住宅物管毛利率肯定比商業類低好多（因當地政府有指導價行政影響）

06989 卓越商企服务依賴母公司輸血比其他2隻輕，而且第三方在管面積增速比較快，於估值上有一定幫助，近排物管股集體回落因為好多公司增速不及預期，尤其在母公司輸血呢一重要環節。

06989 卓越商企服务今次招股基石算多，尤其好多係本身租賃相關物業嘅客戶（騰訊，京東），係物管股中並唔多見，叫做好過冇。

首日孖展372億，次日580億，估計最後截孖800億左右，預期最終共凍約2566.4億（超800倍，對應B頭約0.625%左右，500手估計中2-3手）

翻查對上2年半紀錄，物管股有14次，其中輝立暗盤12↑1平2↓，首日13↑1平1↓

由於估值偏貴，我預期首日升幅在10%-15%，假設B頭中2手，1.2%四日息，上限定價後每股成本約11.36元（即升4.3%打和）

機會成本係如果下星期先聲藥業/合景悠活/世茂服務突然招股，估計未必接得上（因16/10先回水）

有趣數據：對上15次物管股ipo，首日收市價有10隻竟然仲高過輝立收市價。而首日開市價只有5次係高於首日收市價。（如果情況延續，暗盤走或者首日滾水淥腳式走難未必係上算）

 聲明: 以上內容純屬個人意見及分享，並不構成投資、買賣建議或推薦 

01429 天任集團

公司歸類為本地建築股，基本面零幻想空間。

今日初步截孖超1.01倍，比我預計之中少（因有01408 及 01455 大升在前），但亦可能因為輝立冇開正常孖而耀才又要打電話俾經紀先畀孖。

如果扣除輝立+耀才

01455 截孖0.025億

01408 截孖0.0319億

01429 截孖0.2071億

由此可見其實01429嘅其他孖展飛已經升溫，當然唔排除有啲人見輝立耀才冇得孖轉去用其他證券行。所以今次唔可以太進取。

翻查對上兩年半紀錄

建築股+總手10萬以下+終超少於14倍出現22次

輝立暗盤7↓15↑

首日5↓17↑

要留意係有6次強行由10%增加回撥至20%

可見建築股經常爆冷

若計及對上一年新股+總手（50000-60000）+ 截孖（未足額-5倍）出現19次

輝立暗盤2↓17↑

首日2↓1平16↑

(2次大跌皆因強行增加回撥）

更有趣係今次公司與一盈有一個硬包銷協議，其中明確列明總包銷額（公開+國配）為1.4億元，加上最終售價為0.35元（即下限價發行），先至收到1.4億元x6%作佣金。

我理解為極可能以0.35元下限發行，但會否強行回撥文中沒任何暗示或義務。

翻查一盈以往做bookrunner記錄，首日出事均為該新股終超14倍而導致正常回撥，今次01429 天任我認為超14倍機會比（01408 01455）大，但仍然在值博範圍之內。

聲明: 以上內容純屬個人意見及分享，並不構成投資、買賣建議或推薦。

06988 樂享互動

公司基本面一般，但以宜家孖展倍數去睇，明顯係過熱，對應19年PE為61.5-92.267倍，已經超越人類正常思維去定價，上限定價市值已達69.8億。

新股熱潮已於2020年第二季起開始大爆發，農夫山泉乙頭純利只有6108元（假設利息開支為3000元），今次樂享我預期又系冇肉食格局，但穿招機會輕微，首日升幅難以預計。

翻查對上10個月記錄，終超500倍以上出現13次，其中輝立暗盤12↑1↓（移卡）

首日清一色13↑

若計及總凍金額，由500億以上起跳共出現20次。

輝立暗盤18↑2↓（百勝及移卡）

首日19↑1↓（百勝）

總結：上B組頭或以上輸極有限，尤其若搵到低息（0.9%）

預測情形

假設入飛500萬股，利息支出2511元，估計中簽率0.2%，共中10000股（上限定價，貨值約32100元）首日只需升9%就可以打和，就算首日平收，輸極都只係2511+321元+首日佣金，即係3000元左右。我自己對樂享無乜大期望，更預期可能似移卡收場（首日↑6.13%，暗盤↓9.74%），當然也不排除市場亂炒類似09911赤子城，01740新石文化。

瞓身就無必要，不然星期二/三有中大型突擊招股就會進退失據。

聲明: 以上內容純屬個人意見及分享，並不構成投資、買賣建議或推薦。

02101 福祿控股

公司為第三方銷售虛擬物品營運商（月費卡，遊戲幣，外賣紅包，電話卡充值，直播打賞充值點數，在線音樂月卡，QQ會員鑽石等）

公司從虛擬物品供應商以折扣價入貨，再以低於市價（通常為虛擬物品使用場地的直銷價）進行銷售。而呢類型公司往往要100% 預付呢D虛擬物品，所以公司現金流經常不夠10M。亦因為虛擬物品的邊際成本根本係零，所以虛擬物品供應商亦好樂意同呢D第三方合作，以壯大自己現金流及市佔率。

公司17年-19年佣金率非常波動，縱然公司於招股書多番解釋，但我認為係公司所處産業鏈根本無say, 佣金率多與少完全掌握在供貨方（愛奇兿，鬥魚，騰訊，餓了麽，美團等）先天性無任何護城河可言，只能靠不斷擴大規模及劈價去維持競爭力。

好在公司已於19年開始轉營，重點為網店經營（自營及代營）

經詳細比較，愛奇藝天貓店及京東旗艦店應為福祿代營運，愛奇藝為視頻網站大佬（比騰訊視頻更大），福祿做到天貓及京東官方旗艦店獨家營運，足見福祿有一定實力。而且，代經營網店唔使預付，直接從GMⅤ扣除一定百份比作佣金，對舒緩現金流壓力有幫助，毛利率亦比以往更高。（2020 Q1毛利大增跟網店營運服務有直接關係）

估計2020年全年溢利會比2019增長44%以上，以招股價上限8.9元計，對應經調整後PE（2019年 29.87倍，2020年20.65倍）

由於港股中無相關同業上市，所以難以判斷平定貴。但起碼可以預測2020年有一定增長。

風險

-公司現金流長期緊張，若突然有供應商走數（因為100%預付款）就會好大單。

-零護城河，佣金率經常大上大落，難保日後佣金率因供應商內部競爭加劇而下降。

-公司長期享受超低稅率（<3%，因公司好古惑去開新疆，西藏分公司以享受優惠稅率), 若大陸稅局認為公司屬海外公司，分分鐘要跟正常稅率25%去收。

以上為我對公司基本面嘅一D睇法，但都唔係重點。

重點如下:

翻查對上2年半記錄，中型ipo(總手10萬~30萬)而且回撥至50%出現19次。

其中首日出現18↑1↓，輝立暗盤17↑2↓。但當中有10隻為biotech及3隻為物管股，所以今次福祿會唔會類似呢種pattern要打一定折扣。

估計截孖會超500倍，最終可能超900倍左右，因為今次好多銀行冇開孖展，現金飛為主，對總凍金額唔會增加太多。回撥至50%後對應有效倍數為180倍，估計B頭中簽率頂多0.55%左右。

一張B頭為600000股，估計最終獲配3000-3500股（6-7手）

若以6手計，8.9元定價，貨值共26700元，息約2700

再計及1.077%屈機費，要升11.18%先可以打和，我預測穿招機會不高，升20-30%機會比較大，叫做好過冇。

聲明: 以上內容純屬個人意見及分享，並不構成投資、買賣建議或推薦。

01455 科利實業

公司典型OEM/ODM股，基本面毫無幻想力，勝在係呢啲卡窿時間招股，有收埋自私食嫌疑。

總手62500，招股第二日只有0.1072億元（公開集資額為0.15億元），未足額，估計截孖最多達0.5億元左右（即孖超3.33倍），響農夫未回飛之前突撃招股，擺明唔想散戶參與，加上市場各大資金全押農夫，有好多中資證券行都冇提供孖展（例如富途），銀行更極少對呢d中小型開孖，所以預期未必終超14倍以上。

翻查對上兩年半紀錄，62500 總手共出現26次，而終超少於14倍有9次（首日6↑3↓，輝立暗盤7↑1平1↓）

而9次中有2次為強行增加回撥（01701 途迄控股及 02346 星宇控股），而咁啱01701 途屹控股係創陞保薦，首日↓41%之後一年內更化身妖股狂升600%兼閃崩。

另一隻06063智中國際又係創陞保薦，當時又係總手62500，截孖超1.52倍，終超13.15倍，結果輝立暗盤↑108%，首日更升↑176%，而且又係成為妖股（不足3個月又升6.8倍[對應招股價]）當然最後又係閃崩一地雞毛收場。

若果截孖時飛數發狂（超5倍以上），要再進一步度過。我認為呢次01455有一定爆冷機會，我會參與。

聲明: 以上內容純屬個人意見及分享，並不構成投資、買賣建議或推薦。

01408 濠江機電

分類為澳門建築股，基本面一般，但值得留意係客戶D與D先生。根據深入挖掘，客戶D係新濠糸（00200 新濠國際及 MLCO新濠博亞），而D先坐幾乎肯定為何猷龍。（00200同MLCO跟何猷龍關係唔駛問啦）

客戶D由yr17-19佔公司營收由4.8%→29.2%→30.5%再截至yr20 頭2個月達85.9%，可見呢個客戶D及D先生經常關照濠江機電。

更有趣係今次pre ipo有2個人，分別為one wesco 譚先生（佔發行後15.5%，已折讓93.8%）及bridge capital 曾先生（佔發行後9.5%，已折讓93.8%）

譚先生應該指譚志偉，曾係新濠糸做財務及HR高管過10年，而曾先生應該指曾源成，係新濠糸做過十幾年法律顧問。兩人先後離新濠糸但加盟黑桃資本（分別做CEO及法律顧問），而黑桃資本又糸隸屬何猷龍。更巧合係譚丶曾二人於2年前又對濠江機電進行跳樓價pre ipo. 我好難唔幻想公司與客戶D冇任何"特殊"利益關係。

One Wesco上次係01183澳能建設已做過一跳樓價pre ipo（折讓96%），最特別係果時另一個pre ipo投資者係king dragon（何猷龍全資擁有），而king dragon 更於2019年12月全數轉讓股份到澳門瑞盈（估計埋單獲利近2億元），（01183 澳能建設當時超160倍，上限定價，首日↑9.6%，次日再↑29.9%）

我認為今次pre ipo雖然折讓咁深（而且今次賣舊股都有佢2個份，所以佢地一早回哂本，應該可以講係負成本），但睇返呢堆人全部老屎忽，上市後即時沽出呢個可能性唔高，而且01183 澳能建設同今次01408 新濠機電都係創陞主廚，可以講已經有哂默契，駕車就熟。

翻查近2年半紀錄，50000-62500總手而截孖超0.01倍~2倍出現17次

首日 13↑ 4↓

輝立暗盤 13↑ 1平 3↓

而大跌果隻係01701途迄控股（終超5.2倍，強行增加回撥至20%，創陞保薦，首日↓41.3%，輝立暗盤↓8.65%）

宜家01408 及 01405截孖均超少於1倍，若創陞唔玩野，正正常常散戶應佔10%。值博率已經非常高，我會正常突擊佢哋。

聲明: 以上內容純屬個人意見及分享，並不構成投資、買賣建議或推薦。

00368 德合集團

香港本地建築公司，基本面睇黎都嘥氣，集中分析有冇機會被圍飛。

翻查對上2年建築股，若超倍0.01-14倍出現22次，有趣數據如下：

首日6↓16↑，輝立暗盤9↓13↑
強行回撥竟出現7次，佔比31.8%，而當中首日4↓3↑，輝立暗盤6↓1↑。

建築股從來都係爆冷溫床，計及該22隻建築股ipo表現，首日平均升幅44.46%，輝立暗盤平均升幅31.1%。

今次我預咗暗盤最慘輸25%情況（如果又強行由10%回撥至20%）去博佢爆冷。力高歷史保薦唔算太差，通常出事都係回撥至30%-40%（如03938 LFG 投資控股，08475千盛），00368 德合集團宜家截孖超2.16倍，好有機會會少於超14倍，值博。

聲明: 以上內容純屬個人意見及分享，並不構成投資、買賣建議或推薦。

09990 祖龍娛樂

公司主營MMORPG手遊，招股書一再強調公司在細分遊戲類別有幾勁，但睇返啲關鍵經營指標後，又發覺好一般。對比同業00302 中手遊後，更感覺09990 祖龍娛樂有啲輸蝕。

09990 祖龍娛樂於"平均每月活躍用戶"及"平均每月付費用戶"以及ARPPU都處下風

09990 祖龍娛樂

00302中手遊

00302中手遊 yr19經調整溢利達6.11億人仔，而09990 祖龍娛樂只有3.54億人仔。

09990 祖龍娛樂

00302 中手遊

對應yr19溢利，00302 中手遊現時trade緊12倍PE，而09990 招股PE介乎19.91-23.57倍，可見09990估值非常進取！

新股市場緊水，但09990 祖龍娛樂 仍然有36億孖展飛，估計因騰訊佔公司13.34%股份有關，而且GIC入大飛做基石。

睇完啲冧把後，我認為09990 祖龍娛樂本輪新股射程範圍內，但同輪仲有幾隻要考慮，加上中金以往保而不薦嘅風格，我要再觀察多1日決定注碼。

聲明: 以上內容純屬個人意見及分享，並不構成投資、買賣建議或推薦。

06969 思摩爾國際

公司為全球市佔第一嘅電子煙ODM企業，客戶絶對頂級(英美煙草，日本煙草，reynolds等)唔食煙嘅我都肯定聽過。

可比公司於港股系無，但可利用300014億緯鋰能及002595盈趣科技去比較。

002595 盈趣科技現時trade 緊26倍PE, 公司其中一個業務為電子煙器具生產，于對上業績，"創新消費電子產品"占全年所有增長嘅70%，而公司市值約257億人民幣。

300014億緯其實係2014年成為麥克韋爾大股東(思摩爾前身)，後來2017年公司創始人買回億緯當時持股8.98%先再次成為實際大股東為宜家上市開路。

翻查300014億緯最新年報，發現該38.38%持股於2019已帶來共8.22億人民幣利潤(同期公司總利潤先得15.48億人民幣)，可見該部份持股占全公司利潤過半，現時公司總市值875億人民幣，對應PE 55.6倍。

06969思摩爾若上限定價，市值712億港元，對應歷史PE為29.81倍。

億緯自己電池業務營收64億人民幣，扣除思摩爾利潤8.22億人民幣後，只剩低8億人民幣為主營業務之溢利。(主營業務純利率約12.5%)

思摩爾yr19營收76.1億人民幣，純利21.73億人民幣(純利率28.6%)

可見億緯高估值高PE跟思摩爾有好大關係。

公司最大風險係各國對電子煙政策及中美貿易協定。

今次發行574352手算偏多，對上海吉亞共60萬手，共凍1348.7億港元(海吉亞首日孖展286億 vs 思摩爾196億)估計最終超倍未必去到450倍，即有效為90倍左右，B頭有望以1%起跳。

我預算首日升30%以上，值博率比1477高(分貨更多)，而且有中煙效應(當時一個月唔到升5倍)，抽中即食或者留返部份放風箏都未嘗不可。

聲明: 以上內容純屬個人意見及分享，並不構成投資、買賣建議或推薦。

09989 海普瑞-H

公司為肝素領先藥企，但公司在該藥雖然占全中國第一及全球第三，但呢種藥根本唔系咩貴價野(大陸投標價約40元左右)，可想公司以規模效益去攻佔歐美中市場(有別於一般已上市-B藥股)

而且該藥已經過哂專利，即任何藥企都可以仿製，可預料不斷靠壓低成本去爭市場有幾慘烈。

更奇怪系公司預測2020/2021/2022肝納素及API產品因原材料價格上升(非洲豬瘟導致腸衣供應短缺)而會受益。我自己對醫藥唔識，但憑常識認為原材料成本上升，若需求彈性很低(冇替代藥物)，照計終端產品或API原料品理應水漲船高，但升幅估計也是相約，但管理層認為終端產品及API產品售價會倍升，我對此表示質疑，甚至認為管理層有誇大畫餅之嫌。

腸衣成本預計升30%，但産品及API價格會升80%-100%?

另外，yr19業績看似大躍升(對比yr18 ↑69%)，但其實於2019年3月將子公司hightide 分拆，以獲得一次性收益約5.739億人仔，若扣除該收益，yr19稅前收益甚至比yr18差，呢d做法無不令人懷疑為二次上市而整靚盤數。

翻查大摩及高盛對於先A後H表現，撇除01776廣發證券及06806申萬宏源外，其餘首日升跌幅非常有限。

今次難得亮點係orbimed入重飛(50M美元)，之前幾次入股其他藥企都少於50M美元[但會否之前果堆太hit, 根本分唔到咁多？而今次09989又冇乜其他基石爭？]

我預期升幅非常有限，甚至只有0%-5%左右。

聲明: 以上內容純屬個人意見及分享，並不構成投資、買賣建議或推薦。